سوریالیزم و(عه‌باس عه‌بدوڵڵا ) له‌ شیعری كوردیدا

Abstract

سوریالیزم وه‌كو ڕێبازێكی ئه‌ده‌بی كه‌له‌سه‌ده‌ی ڕابردوودا پێویستی واقیع هێنایه‌كایه‌وه‌ دوای دادایزم ، ڕه‌نگدانه‌وه‌یه‌كی به‌رچاوی هه‌بووه‌ له‌ ئه‌ده‌بیاتی جیهانی و ئه‌ده‌بی كوردی ، كاریگه‌ری خۆی هه‌بووه‌ له‌ به‌رجه‌سته‌كردنی هه‌ستی نوسه‌ران و ڕۆشنبیرو هونه‌رمه‌ندان به‌تایبه‌تی له‌و واقیعه‌ ناله‌باره‌ی تیایدا ژیاون ، به‌مه‌به‌ستی هۆشیاركردنه‌وه‌ی ده‌سته‌و چینه‌كانی كۆمه‌ڵ ، له‌م ڕێبازه‌دا شاعیر وێنای هه‌سته‌ ناوه‌كیه‌كانی ده‌كات و ڕه‌نگدانه‌وه‌ی پێده‌دات له‌ ده‌ره‌وه‌ به‌ شێوه‌یه‌كی هونه‌ری به‌رز ، به‌مه‌به‌ستی جوڵاندنی لایه‌نه‌ پێكراوه‌كان له‌ وه‌رگردا. لێره‌دا دیارده‌كانی خه‌سڵه‌تی دیاری سیمای ڕێبازی سوریالیزم له‌ شیعرداو شیعره‌كانی (عه‌باس عه‌بدوڵڵا) به‌نموونه‌ ، یه‌كێكه‌ له‌ شاعیرانی هاوچه‌رخی كوردی ڕاسته‌وخۆ ئه‌و بواره‌ی له‌به‌رده‌م لێكۆلینه‌وه‌ كه‌ماندا ده‌كاته‌وه‌. (سوریالیزم و عه‌باس عه‌بدوڵڵا له‌ شیعری كوردیدا) هه‌وڵێكه‌ بۆخوێندنه‌وه‌ی خه‌سڵه‌ت و سیماكانی سوریالیزم و شیعره‌كانی (عه‌باس) به‌پێی ڕێبازی سوریالیزم. سنوری لێكۆڵینه‌وه‌كه‌شمان تایبه‌ته‌ به‌ چه‌مكی سوریالیزم له‌ شیعردا به‌تایبه‌تی ، شیعره‌كانی (عه‌باس عه‌بدوڵڵا)شمان به‌ نموونه‌ وه‌رگرتووه‌ ، لێكۆڵینه‌وه‌كه‌مان به‌و چوارچێوه‌وه‌ به‌ندكردووه‌ تا بتوانین به‌چڕی گشت لایه‌نه‌كانی ئه‌م ڕێبازه‌ ئه‌ده‌بییه‌ و شیعره‌كانی (عه‌باس عه‌بدوڵڵا) له‌م ڕووه‌وه‌ ڕوون بكه‌ینه‌وه‌. له‌ نوسینی ئه‌م لێكۆلینه‌وه‌یه‌دا په‌یڕه‌وی ڕێبازی مێژوویی وه‌سفی ، شیكاری ڕه‌خنه‌یی كراوه‌ ، لە بەشی یەكەمدا لەڕووی مێژوویی و وەسفی قسە لەسەر بابەتەكە كراوەو لە بەشی دووەمیشدا بۆچوونه‌ ڕه‌خه‌ییه‌كانمان بۆ شیكاركردنی شیعره‌كان و ئەنجامی بابەتەكە ڕۆشتووین‌. بنیادی لێكۆڵینه‌وه‌كه‌شمان به‌مجۆره‌ دارشتووه‌ ، جگه‌ له‌م پێشه‌كییه‌ له‌ دوو به‌شی سه‌ره‌كی و ئه‌نجام و لیستی سه‌رچاوه‌كان و پوخته‌ی باسه‌كه‌ به‌ زمانی عه‌ره‌بی و ئینگلیزی پێكهاتووه‌. له‌ به‌شی یه‌كه‌مدا باس له‌ چه‌مك و مێژووی ڕێبازی سوریالیزم و خه‌سڵه‌ت و سیماو بنه‌ما هونه‌رییه‌كانی ڕێبازی سوریالیزم كراوه‌. له‌ به‌شی دووه‌میشدا باس له‌ ڕه‌نگدانه‌وه‌ی هونه‌ره‌كانی سوریالیزم ( خه‌ون ، ته‌قاندنه‌وه‌ی هه‌ستی نائاگا ، نوسینی ئۆتۆماتیکی ، لاشه‌ی به‌تام ، سه‌رسورهێن ، هونه‌ری گاڵته‌کردن ، شێتی)له‌ شیعره‌كانی (عه‌باس عه‌بدوڵڵا)دا كراوه‌..