دامه‌زراندن و ئامانجه‌كانی كۆمه‌ڵه‌ی ژێكاف
Barra lateral del artículo
Contenido principal del artículo
Resumen
پوخته
دامه‌زراندنی كۆمه‌ڵه‌ی ژێكاف له ڕۆژهه‌ڵاتی كوردستان، به قۆناغێكی گرنگ داده‌نرێت له مێژووی خه‌باتی نه‌ته‌وایه‌تی ئه‌و پارچه‌یه‌دا. له دواتریشدا كاریگه‌ری له‌سه‌ر بزووتنه‌وه‌‌ی ڕزگاریخوازیی كوردی له پارچه‌كانی دیكه‌ی كوردستان هه‌بوو.
جه‌نگی دووه‌می جیهانی هه‌رچه‌ند جه‌نگێكی ماڵ وێرانكه‌ر بوو بۆ گه‌لانی دونیا، به‌ڵام له‌گه‌ڵ ئه‌وه‌شدا بارودۆخی جه‌نگ له ئێران ده‌رفه‌تێكی بۆ گه‌لی كورد ڕه‌خساند، تاكو هه‌ناسه‌یه‌كی ئازادی هه‌ڵمژن و به ئاشكرا خه‌باتی سیاسی ئه‌نجام بده‌ن، له پێناو گه‌یشتن به مافه سیاسیی و نه‌ته‌وه‌ییه‌كانیان. ده‌توانین دامه‌زراندنی كۆمه‌ڵه‌ی ژێكاف، به هه‌نگاوه سه‌ره‌تاییه‌كانی دامه‌زراندنی كۆماری كوردستان دابنێین له مه‌هاباد، چونكه هه‌ر ئه‌م كۆمه‌ڵه‌یه و بیروباوه‌ڕه‌كانی بوو، دواتر بووه هه‌وێنی دامه‌زراندنی حزبی دیموكرات و دواتریش دامه‌زراندنی كۆماری كوردستان.
بۆیه ئه‌نجامدانی هه‌ر توێژینه‌وه‌یه‌ك له‌م باره‌یه‌وه گرنگی تایبه‌تمه‌ندی خۆی هه‌یه له ڕووی مێژووییه‌وه، چونكه لێكۆڵینه‌وه‌یه له وێسته‌گه‌یه‌كی گرنگی قۆناغی مێژووی خه‌باتی سیاسیی گه‌لی كورد. توێژینه‌وه‌كه له چوار ته‌وه‌ری سه‌ره‌كی پێكدێت، له ته‌وه‌ری یه‌كه‌مدا تیشك خراوه‌ته سه‌ر هه‌لومه‌رج و هۆكاره‌كانی دامه‌زراندنی كۆمه‌ڵه‌ی ژێكاف، له‌م باره‌یه‌وه هه‌وڵدراوه بارودۆخی كوردستانی ڕۆژهه‌ڵات له سه‌روبه‌ندی جه‌نگی دووه‌می جیهانی ڕوون بكرێته‌وه و ئه‌و فاكته‌رانه‌ی كه بوونه هۆی دروستبوونی كۆمه‌ڵه‌كه بخرێته به‌رچاو. ته‌وه‌ری دووه‌م ته‌رخانكراوه، بۆ دامه‌زراندنی ژێكاف و ئامانجه‌كانی، له چه‌ند خاڵێكدا دامه‌زراند و په‌یڕه‌وی ناوخۆ و ئامانجه‌كانی ڕوون كراوه‌ته‌وه. ته‌وه‌ری سێیه‌م ته‌رخانكراوه بۆ كار و چالاكیی و بڵاوكراوه‌كانی كۆمه‌ڵه‌كه، له‌م ته‌وه‌ره‌شدا سه‌رجه‌م كار و چالاكیی و بڵاوكراوه‌كانیان به چه‌ند خاڵێك خراوه‌ته‌ڕوو. ته‌وه‌ری چواره‌م و كۆتایی ته‌رخان كراوه بۆ په‌یوه‌ندییه‌كانی ژێكاف و هه‌ڵوه‌شاندنه‌وه‌ی كۆمه‌ڵه‌كه.
وشه سه‌ره‌كییه‌كان: كۆمه‌ڵه‌ی ژێكاف، كوردستان، ئێران، جه‌نگی دووه‌می جیهانی، قازی محمد.